Upplýsingar til sýnenda

Mannamót er stefnumót fagaðila í ferðaþjónustu á Íslandi.

Markaðsstofur landshlutanna setja upp vinnufundinn MANNAMÓT í Reykjavík fyrir samstarfsfyrirtæki sín fimmtudaginn 19. janúar 2017 kl. 12:00 – 17:00 í flugskýli flugfélagsins Ernis á Reykjavíkurflugvelli.

Mannmót markaðsstofanna er hugsað sem kynningarvettvangur ferðaþjónustunnar á landsbyggðinni og tækifæri til að koma á fundum fagaðila í greininni. Tilgangurinn er að kynna landsbyggðarfyrirtæki fyrir ferðaþjónustuaðilum sem staðsettir eru víðs vegar um landið. Ísland hefur mikið upp á að bjóða og Mannamót hjálpa til við að mynda og efla tengsl innan ferðaþjónustunnar. Gestum á Mannamótum gefst kostur á kynna sér það sem mismundi landshlutar eru að bjóða uppá með áherslu á vetrarferðaþjónustu.

Á Mannamót bjóðum við gestum af höfuðborgarsvæðinu að koma að hitta okkur. Við sendum út rafræn boð og dreifum einnig boðskortum beint á skrifstofurnar:

  • Starfsfólki ferðaskrifstofa og ferðaskipuleggjenda
  • Starfsfólki upplýsinga- og bókunarmiðstöðva
  • Leiðsögumönnum
  • Nemendum í leiðsögunámi og ferðamálafræðum ásamt kennurum í ferðamálagreinum
  • Starfsfólki í þjónustuverum flugfélaga
  • Sölu- og kynningarfólki flugfélaga
  • Starfsfólki í mótttökum hótela og gistihúsa
  • Fjölmiðlum
  • Opinberum stofnunum:  Íslandsstofa, Ferðamálastofa, Atvinnuvega- og nýsköpunarráðuneyti, Innanríkisráðuneytið, Samgöngustofu, Isavia, ofl.

Enginn aðgangseyrir er fyrir gesti á sýninguna. 

Að þessu sinni sendum við einnig út boðskort til erlendra ferðaskrifstofa og hvetjum við alla þátttakendur til að bjóða sínum tengiliðum. Við gerum þó ekki ráð fyrir miklum fjölda erlendra aðila í ár en erum að láta vita að þetta sé árlegt svo hægt sé að undirbúa þátttöku fyrir næsta ár ef áhugi er á. 

Skráning og gjald

Þátttökugjald fyrir hvert fyrirtæki er kr. 15.000 + vsk. Einungis samstarfsfyrirtæki markaðsstofanna geta tekið þátt sem sýnendur í Mannamóti 2017. Skráningu lýkur 12. janúar 2017. Skráning fer fram á heimasíðu Mannamóta  www.markadsstofur.is.

Staðsetning og bílastæði

Mannamót 2017 verða haldin í flugskýli flugfélagsins Ernis á Reykjavíkurflugvelli (sjá kort neðst á síðunni). Athugið að vegna takmörkunar á bílastæðum við flugskýli Ernis, verður sýnendum og gestum boðið að leggja bílum sínum við Perluna og verður boðið uppá skutlu sem keyrir milli neðra bílastæðis Perlunnar og flugskýlisins. 

Mynd sem sýnir staðsetningu neðra bílastæðis við Perluna og leiðina að flugskýli Ernis:

Bílastæði við perluna

Tímaáætlun bílastæðaferða

Tímaáætlun 19. janúar 2017

Frá Perlunni fer fyrsta ferð kl: 10:20, skutlan fer síðan á 20 mín fresti til 18:00
Frá flugskýli Ernis fer fyrsta ferð kl: 10:30, skutlan fer síðan þaðan á 20 mín fresti til 17:50. 

Hópferðir Sævars sjá um akstur til og frá sýningarsvæði. Frítt er í skutluna.  Tímatöflu á pdf formi má finna hér

Tímasetningar

  • Sýningarsalur tilbúinn fyrir þátttakendur kl. 10:30
  • Uppsetning milli kl. 10:30-12:00
  • Opið fyrir gesti: 12:00 – 17:00

Athugið að mikilvægt er að sýnendur byrji ekki að taka saman fyrr en að sýningunni er lokið kl 17:00. Einnig biðjum við sýnendur að koma ekki í flugskýlið fyrr en kl 10:30 þar sem þá stendur yfir uppsetning á básum sem þarf að ganga hratt og vel fyrir sig.

Að lokinni sýningu

Eftir sýninguna bjóða markaðsstofur landshlutanna sýnendum uppá fordrykk á Satt restaurant. Satt býður sýnendum einnig uppá tilboð á kvöldverði, en Satt restaurant er staðsett inn á Icelandair hotel Natura í næsta húsi við flugskýli flugfélagsins Ernis.

Almennt fyrirkomulag

Á Mannamótum er hefðbundið vinnusýningarskipulag en ekki eru fundabókanir.

Stærð og fyrirkomulag á bás

Hvert fyrirtæki hefur um 1 m af borðplássi og 1 vegg á bak við sig (prentstærð er 95x239 cm á milli járna) til umráða og er staðsett á sama stað og önnur fyrirtæki úr sama landshluta.

Markaðsstofa hvers landshluta raðar upp fyrirtækjum innan síns svæðis og gætir þess að fyrirtæki sem starfa á ákveðnum svæðum séu í nágrenni við hvert annað en einnig að samkeppnisaðilar í sambærilegum rekstri séu ekki hlið við hlið. 

  • Einnota hvítur dúkur verður á öllum borðum.
  • Gott er að hafa með sér auglýsingastand til að hafa á bak við sig, nafnspjöld, bæklinga og annað kynningarefni til að dreifa til gesta.
  • Rafmagn verður ekki í boði inn á sýningarsvæði. Verið því með full hlaðnar tölvur og raftæki.
  • Þráðlaust net er ekki til staðar. Hægt að notast við 3G.
  • Opinn eldur er ekki leyfður á sýningarsvæði.
  • Salerni verða staðsett fyrir framan flugskýlið.
  • Bílastæði eru takmörkuð. Sýnendur eru hvattir til að nýta skutlu sem fer á 20 mín fresti frá Perlunni til að komast á sýningarsvæðið og gefa þannig kaupendum kost á að nýta bílastæðin. Ef þess er ekki kostur að leggja þá bílum á stæðum sem eru lengra frá flugskýlinu og koma fleiri saman í bíl.

Kynningarefni

Á Mannamótum hvetjum við þátttökufyrirtæki til að bjóða upp á léttar veitingar og smakk úr heimabyggð auk þess að taka með sér kynningarefni sem gefur góða mynd af sérkennum svæða og fyrirtækja.

Sýnendur fá svart hálsband þar sem hægt er að setja nafnspjald eða skrifa nafn einstaklings og fyrirtækis. Gestir fá hvítt hálsband við inngang og eru þannig aðgreindir frá öðrum sýnendum. 

Gott að hafa í huga fyrir Mannamót:

  • Nafnspjöld. Vera með nafnspjöld til að dreifa og vera dugleg að fá nafnspjöld frá aðilum sem heimsækja og þannig safna tengiliðum fyrir fyrirtækið.
  • Bæklinga eða flyer. Upplýsingar um fyrirtækið og vöruna sem verið er að bjóða uppá. Nafn á fyrirtæki, staðsetningu (ekki gleyma að setja hvar á landinu viðkomandi þjónusta er), hvaða vöru er verið að bjóða uppá, mikilvægt að hafa góðar myndir því myndir segja jú meira en 1000 orð.
  • Veggspjald eða auglýsingastand. 
  • Tölvu/spjaldtölvu til að sýna fleiri myndir, aðstöðu og þjónsutuframboð (athugið þó að rafmagn er ekki í boði svo takið með aukahleðslu).
  • Vörur/smakk úr héraði. 
  • Hafa í huga hvað á að segja og hvað þarf að koma fram. Hvað er aðalatriði og hvað eru aukaatriði. Æfa lyfturæðuna. Það gæti orðið mikið af fólki og lítill tími með hverjum og einum.
  • Njóttu þess að vera til, njóttu þess að vera á staðnum, ná augnsambandi og brosa. Ekki gleyma að þú ert þarna til að ná samtali við gestina og þar sem ekki eru fyrirframbókaðir fundir byggir árangurinn á því hversu góður sölumaður þú ert.

Markaðsstofur landshlutanna hvetja öll fyrirtæki í ferðaþjónustu til að taka þátt í Mannamóti og nýta tækifærið til kynningar og sölu á sínu fyrirtæki. Þetta er einstakt tækifæri til að efla tengsl við núverandi viðskiptavini, mynda ný tengsl og ekki síður til að kynnast samstarfsaðilum um allt land.

Mannamót hefur þá sérstöðu að í sýningunni taka þátt fyrirtæki af öllum stærðum og gerðum, gömul og ný, frá öllum landshlutum. Uppsetningin og aðstaðan er hrá, óformleg og gefur góða mynd af sérkennum svæðanna sem hefur vakið ánægju bæði gesta og sýnenda. Markaðsstofurnar senda út þjónustukönnun eftir hverja sýningu þar sem aðilum gefst kostur á að koma skoðun sinni á framfæri og reynum við að aðlaga þjónustuna og skipulagið hverju sinni að þeim athugasemdum og tillögum sem koma fram.

Ef spurningar vakna varðandi þátttökuna hafðu þá samband við þína markaðsstofu.

Reykjanes: thura@visitreykjanes.is
Vesturland: upplýsingamidstod@vesturland.is
Vestfirðir: travel@westfjords.is
Norðurland: info@nordurland.is
Austurland: east@east.is
Suðurland: info@south.is

Tilboð á flugi, gistingu og prenti

Flugfélagið Ernir býður sýnendum á Mannamóti 30% afslátt af flugi í tengslum við sýninguna. Hægt er að bóka flug með því að senda póst á bokanir@ernir.is. Taka þarf fram að um flug/afslátt sé að ræða vegna Mannamóta ásamt dagsetningu sýningar.

Flugfélag Íslands býður sýnendum afslátt af flugi í tengslum við Mannamót. Afslátturinn er fenginn með því að slá inn afsláttarkóðann: MANNAMOT í dálkinn efst til hægri í bókunarvélinni á heimasíðunni. Kóðinn gefur 20% afslátt af Ferðasætum ef bókað er á www.flugfelag.is. Þetta er bókanlegt frá og með deginum í dag og gildir fyrir ferðatímabil 16.jan – 22.jan. Gildir á öllum áfangastöðum Flugfélags Íslands innanlands.

Icelandair Hótel Reykjavík Natura  býður 25% afslátt af gistingu fyrir sýnendur. Gistingin er endurgreiðanleg en það er 48 tíma afbókunarfyrirvari. Linkurinn til að bók er hérna

Sýningakerfi ehf sjá um kerfin á sýningunni og bjóða upp á alla prentþjónustu fyrir fyrirtæki og aðstoð við uppsetningu á Mannamótum. Sendið tölvupóst á gudni@syning.is fyrir frekari upplýsingar og pantanir. 

Oddi býður eftirfarandi prenttilboð til sýnenda: 

Prenttilboð

 

Hlökkum til að eiga frábæran dag með ykkur á MANNAMÓTUM 2017!

Markaðsstofur landshlutanna

 

Staðsetning


View Larger Map